Ponakanku ing Jawa takon piye adhate wong Amerika yen mertamu.
Adhate, sawetara dina sadurunge mertamu, sing meh mertamu karo sing ditamoni janjian dhisik. Yen ora sempat janjian, sing arep mertamu nelpon dhisik takon menawa sing ditamoni longgar lan dheweke entuk teka. Sawise sepakat jame, sing mertamu bisa teka. Sing arep ditamoni bisa wae omong yen lagi ora longgar.
Yen tamune wis dilungguhke, tuan rumah nawani wedang lan/utawa panganan. Dheweke bisa ngarani apa sing arep disuguhke, kayata es teh utawa jus jeruk, biskuit utawa criping. Tamune bisa nampa utawa nolak. Luwih apik nolak yen pancen ora gelem ngombe utawa mangan. Dianggep ora sopan yen tamune ora nolak pas ditawani nanging banjur ora ngombe utawa mangan suguhane.
Kadhang kala tamune pengen dolan rada suwe. Tuan rumah bisa kanti alus ngongkon tamune mulih. Mesthine dheweke kudu menehi alesan. Blaka wae. Iki luwih apik lan tamune temtu bisa nampa.
Ing Amerika, biasane tamu ditampa ing dhapur yen ing dhapur ana meja kursine. Yen ora, padha jagongan ing ruang makan. Menawa hawane ora pati adhem, tamu lan tuan rumah lungguh-lungguh ing teras utawa balkon. Kanti mangkono, suasanane dadi akrab. Mung tamu sing ora pati akrab lan sing duwe urusan resmi, umpamane saka sawijining kantor pemerintah, ditemoni ing ruang tamu.
Uga adhate ing Amerika, nalika sepisanan mertamu ing sawijining omah, tamune bisa njaluk house tour. Sing duwe omah uga bisa nawani yen tamune gelem dijak house tour. Ngelem mebel, lukisan, vas kembang, utawa apa wae ing omah kuwi utawa penganggone tuan rumah kayata klambi, sepatu, modhel rambut, lsp. gawe bungah tuan rumah lan bisa dadi bahan omong-omong sing gayeng. (Adhat ngelem penganggone liyan ora mung pas mertamu, bisa sawanci-wanci.)
Oh..aja lali matur panuwun sawise tuan rumah menehi house tour, manggakke lungguh, nyuguhke wedang lan panganan. Lan temtu wae nalika pamit.
Piye? Saiki wis siap mertamu ing omahe wong Amerika?
Aku pamit dhisik, ya.
No comments:
Post a Comment