Dina Minggu kepungkur aku mangkat nyang Madison, Wisconsin kanggo mulang basa Jawa neng program Southeast Asian Studies Summer Institute (SEASSI). Mangsa ketiga iki wis kaping enem aku mulang neng SEASSI. Kelase pancena lagi wiwit suk tanggal 15 Juni. Nanging seminggu iki ana lokakarya kanggo guru-guru SEASSI lan kudu nyiapke wulangan.
Aku tekan Madison kira-kira jam 4 sore. Merga durung entuk pondokan, aku nginep neng omahe Arti, sakwijining guru basa Indonesia neng SEASSI.
Pertemuan Senen esuk mung setengah dina. Isine sambutan saka direktur basa lan ramah tamah. Sakwise kuwi aku nyang pondokan sing sakdurunge wis takhubungi lewat e-mail. Karo manajer apartemen, aku niliki apartemene, banjur teken kontrak. Sorene aku nyang toko tuku air mattress, lan keperluan liyane.
Pirang-pirang dina iki kegiatanku nyang kampus, mlaku-mlaku, nyang perpustakaan, maca-maca, trus kira-kira jam 9 bengi balik nyang apartemen. Neng apartemenku mung ana air mattress, kursi loro, sak koper klambi. Neng pawon mung ana roti sebungkus, teh segalon, karo banyu putih. Sing dadi pikiranku: sakjane aku isa urip kanti sederhana. Aku ora butuh mebel mewah tur akeh, tv, klambi & sepatu sing cacahe rak-rakan. Lan yen bengi wancine turu rasaku puas & produktif.
Muga-muga pikiran kaya ngene iki bisa takteruske mengko neng DC.
No comments:
Post a Comment