Selasa, 20 Januari 2009 dina sing bersejarah kanggo wong Amerika lan mbok menawa wong sak ndoya. Barrack Husein Obama dilantik dadi presiden Amerika Serikat sing ke-44. Dheweke presiden kulit hitam pertama ing AS.
Dina kuwi akeh sekolahan, kampus, lan kantor ing Washington, DC prei. Kampusku uga prei. Kebijakan iku perlu kanggo menehi wektu kanggo uwong-uwong sing arep nyekseni peristiwa bersejarah kuwi mau.
Pancen tenan, kira-kira rong juta uwong ngebaki lapangan National Mall, saka ngarep gedung Capitol Hill, panggonan pelantikan, nganti Monumen Washington. Uwong-uwong kuwi mau teka saka sak kabehe negara bagian AS lan negara-negara liya uga. Ora peduli hawa sing adhem (kira-kira 15 derajat Farenheit), kabeh padha bungah lan trenyuh.
Sawise pelantikan, presiden, anggota senat, lan para panggedhe liyane dhahar awan. Pas acara kuwi Senator Kennedy anfal gerahe, dadi kudu digawa nyang rumah sakit. Sorene Presiden Obama sak kluarga mirsani pawai neng Pennsylvania Avenue, neng ngarepe Gedung Putih. Ana kira-kira 13.000 uwong sing melu pawai. Bengine pasangan nomor 1 AS kuwi ngrawuhi 10 acara pesta dansa.
Aku nonton acara kuwi kabeh neng tv saka jam 8 esuk nganti jam 8 bengi. Ora kademen lan isa karo ngombe susu coklat. Bungahku padha karo bungahe uwong-uwong sing neng National Mall.
Selamat Presiden Obama! Mugi-mugi panjenengan diparingi kekuatan lan kebijaksanaan dening Allah Bapa kagem mimpin AS dumugi negari ingkang gemah ripah loh jinawi karta raharjo. Amin.
No comments:
Post a Comment